Համաձայնագիրը ներքին սահմանադրություն է երկու կուսակցությունների համար. Արմեն Ռուստամյան (Դիտել տեսանյութը)

ՀՅԴ-ՀՀԿ քաղաքական համագործակցության համաձայնագրում ամրագրված է, որ իշխանությունը պետք է տարանջատվի բիզնեսից: ԱԺ ավանդական ճեպազրույցում ՀՅԴ խմբակցության ղեկավար Արմեն Ռուստամյանից լրագրողները հետաքրքրվեցին, թե ինչպե՞ս է ՀՀԿ-ն պայքարելու ինքն իր դեմ: «Դրա համար այն մեխանիզմները, որոնց մասին մենք խոսում ենք, պետք է հաստատվեն: Առաջին` էթիկայի հանձանաժողովի հետ կապված մեր հաստատումը պատահական չի բերված: Նույն այդ կառույցը ստեղծվել է հենց դրա համար, որպեսզի բացահայտի շահերի բախման բոլոր դեպքերը, անաչառ կերպով դա անի, և մենք անգամ ունենք փաստ, որ դիմել են այդ հարցով, բայց քանի որ էթիկայի հանձնաժողովը չի ձևավորվել հավասարակշռված, բալանսավորված կազմով, խնդիրը չի լուծվել: Հիմա մենք վերանայելու ենք բոլոր մոտեցումները: Նույնը վերաբերում է կոռուպցիայի դեմ պայքարին»,- բացատրեց Ռուստամյանը: ՀՅԴ-ականի խոսքով` այս գործընթացներում գործուն մասնակցություն պետք է ունենան քաղաքացիական հասարակությունը և ընդդիմությունը, որպեսզի հնարավոր լինի ներսից որոշումներն այնպիսին դարձնել, որ համոզիչ ու վստահելի լինեն, որպեսզի որևէ մեկը չփորձի դրանով պաշտպանվել: «Չպետք է ստեղծենք այլ մարմիններ, որ պաշտպանեն իշխանավորներին կամ որևէ մեկին, պետք է իսկապես լինեն այնպիսի մարմիններ, որոնք անկախ, անաչառ գործեն և արժանիորեն պատժեն մեղավորներին: Դրա գլխավոր քայլը լինելու է դատական իշխանության անկախացումը, դրանից բխելու է ամեն ինչ: Մենք այսօր ունենք մի դատական իշխանություն, որն անկախ չի կարող լինել, սակայն այն, ինչ պետք է լինի առաջիկայում, լիովին անկախ է լինելու գործադիրից»,- ասաց նա: Ռուստամյանը նշեց, որ երբ սկսվեն դատական օրենսգրքի ստեղծման աշխատանքները, այդ ամենն ավելի կամրապնդվի: «Դրա համար ենք նաև այս համագործակցությանը գնացել և Սահմանադրությունը կյանքի կոչելու մյուս փուլն էլ պետք է կատարենք, որ որևէ մեկի մոտ կասկած չմնա, որ ինչ գրված է, թղթի վրա չմնա: Համաձայնագիրն էլ ներքին սահմանադրությունն է երկու կուսակցությունների համար»,- ասաց նա: ՀՅԴ խմբակցության ղեկավար Արմեն Ռուստամյանն այսօր խորհրդարանական ճեպազրույցների ընթացքում անդրադարձավ կալանավորված Վարդգես Գասպարիին և նշեց, որ կա հինգ չափորոշիչ, որոնց առկայության պարագայում միայն կարելի է կիրառել «քաղբանտարյալ» բնորոշումը: Նրա խոսքով` իրենք չէ, որ պետք է որոշեն` անձը քաղբանտարկյա՞լ է, թե՞ ոչ. Այդ չափորոշիչներն ընդունված են Եվրոպայի խորհրդում, և դրանցով մասնագետները պետք է գնահատեն, իսկ այդ գնահատականները չպետք է քաղաքական դրդապատճառներով լինեն: «Եվրոպայի խորհուրդ կա, որը զբաղվում է այդ ամենով: Եթե այդպես լինի, մոնիթորինգի հանձնաժողովը կարձագանքի, և համապատասխան անաչառ մարմինները գնահատական կտան, ոչ թե` ով երբ ուզենա, իր նախասիրություններից, իր քաղաքական դրդապատճառներից ելնելով, որոշի` ով ինչ բանտարկյալ է»,- ասաց Ռուստամյանը: Հարցին` երբ 90-ականների սկզբին դաշնակցական գործիչներն էին հայտնվել ճաղերի հետևում, այդ միջազգային կառույցներն ու կազմակերպություննե՞րն էին գնահատական տվել, որ Դուք քաղբանտարկյալ եք, նա արձագանքեց. «Դժբախտաբար, չկային այն ժամանակ այն չափորոշիչները: Այն ժամանակ, երբ մենք բանտերում էինք, Հայաստանը Եվրոպայի խորհրդի անդամ էլ չէր, և դա էր առիթ տվել իշխանություններին, որ ինչ ուզենան` անեն: Եթե այսօրվա չափորոշիչները վերցնենք և անցած փաստերը համադրենք, կտեսնենք, որ, միանշանակ, քաղբանտարկյալ են: Բա քաղբանտարկյալն էլ ո՞նց է լինում, եթե ես բանտարկվում եմ երկու` մահապատժի ենթակա հոդվածներով` ընդհանուր գումարային 65 տարով, հետո նույն այդ դատարանը փոխում է պատժամիջոցները և երեք տարի է որոշում պատժել: Անգամ այս ամենից երևում է, որ քաղաքական ենթատեքստեր են եղել, բայց այդ ժամանակ Հայաստանն այդ կառույցի անդամ չէր»,- ասաց Ռուստամյանը: Հարցին, թե` ձեզանից հետո ՀՀ-ում քաղբանտարկյալներ եղե՞լ են, պատասխանեց. «Այդ հինգ չափորոշիչներին համապատասխանող քաղբանտարկյալներ չեն եղել: Եվրոպայի խորհրդում չի եղել հայտարարություն, որ Հայաստանում կան քաղբանտարկյալներ: Դա փաստ է»: Ռուստամյանը նշեց, որ իրեն անգամ ասել են` ինչո՞ւ չեք գնացել արդարացման: «Բայց ես չեմ ուզել, որովհետև ես համարում եմ, որ այդ իշխանությունների դեմ պայքարել եմ, և դրա համար, կոչերի համար նախատեսված է եղել պատիժ: Ես համարում եմ, որ եթե գնամ, արդարանամ, կստացվի, որ ես այդ կոչերը չեմ արել, բայց` ոչ, մի հատ էլ լինի, նույնը կանեմ»,- ընդգծեց նա: Հարցին, թե մարտի 1-ից հետո՞ էլ չեն եղել քաղաքական բանտարկյալներ, Ռուստամյանը եւս մեկ անգամ կրկնեց, որ կան հինգ չափորոշիչներ: «Մեր դեպքի մասին ասեմ, որ ես խոսել եմ մասնագետների հետ, մենք այդ ամենը քննարկել ենք, մոնիթորինգի հանձնաժողովում ես ներկայացրել եմ հարցերը, և եթե այն ժամանակ այդ հանձնաժողովը լիներ, այո, մենք կհամարեինք, որ այդ չափանիշների մասին է խոսքը: Չորս-հինգ տարի Եվրոպայի խորհուրդը զբաղվել է այս հարցով, Ադրբեջանն ամեն ինչ անում էր, որ դա տեղի չունեն: Միակ երկիրը, որ ցանկ ունի, որտեղ իսկապես քաղբանտարկյալներ են նշված, Ադրբեջանն է, ուրիշ դեպք չկա»,- ասաց ՀՅԴ-ականը: Ռուստամյանը նշեց նաև, որ իրենք չեն այցելել Վարդգես Գասպարիին, բայց հետևելու են, որ համապատասխան մարմինները դրանով զբաղվեն: «Իրենց ինչ ցավն է, ուզում են անպայման Քոչարյանը գա՞, է՞դ են ուզում». նման կերպ արձագանքեց «Հայ Յեղափոխական Դաշնակցություն» խմբակցության ղեկավար Արմեն Ռուստամյանը՝ պատասխանելով այն հարցին, թե ինչպես է գնահատում «Հայ ազգային կոնգրես» խմբակցության ղեկավար Լևոն Զուրաբյանի այն հայտարարությունը, թե ՀՅԴ-ՀՀԿ համագործակցությունը նաև այն բանի համար է, որ օտարեն ՀՀ երկրորդ նախագահ Ռոբերտ Քոչարյանի հնարավոր վերադարձը: «Զարմանալի է, որ օտարելու մեջ մեղադրում են մի քաղաքական ուժի, որն այդ անձի հետ համագործակցության երկար պատմություն ունի, և այն մարդիկ, ովքեր դավաճանության ու ինչ համար ասես այդ մարդուն չեն մեղադրել՝ նրան համարելով հայության թիվ մեկ թշնամին»,-ասաց նա: Արմեն Ռուստամյանը նշեց, որ ՀՅԴ-ն միշտ էլ Ռոբերտ Քոչարյանի հետ համագործակցել է, և այդ համագործակցության մեջ պաշտպանել են իրենց կետերը նաև Քոչարյանի հետ: «Մենք այսօր էլ նորմալ հարաբերությունների մեջ ենք Քոչարյանի հետ, և եթե նա որոշի ակտիվ քաղաքականության մեջ լինել, կողջունենք, մենք իսկապես աշխատել ենք միասին, և այդ տարիները մեր երկրի համար վատ տարիներ չեն եղել, վերելքի տարիներ են եղել»,-ասաց նա: Իսկ եթե վերադառնա, արդյո՞ք կթողնեն ՀՀԿ-ի հետ համագործակցությունը, Ռուստամյանը նշեց, որ կապ չունի, թե ում հետ են համագործակցում, կարևորը՝ ընդունեն իրենց կողմից նշված ծրագրերի շուրջ լինի: «Մենք եթե գտնում ենք մի գործընկեր, ում հետ հնարավոր է այդ ծրագրերը առաջ տանել, ուրեմն երրորդի դե՞մ է։ Մեր կուսակցությունը միջոց է այդ նպատակները կիրառելու համար»,-ասաց նա: Հարցին, թե քանի բավարա՞ր են արդյոք պորտֆելները, որ ՀՅԴ-ն իր ծրագրերը կյանքի կոչի, ՀՅԴ-ական պատգամավորը պատասխանեց, թե պորտֆելների միջոցով չի որոշվելու բավարարը և ոչ բավարարը: «Սա դասական իմաստով կոալիցիա չէ, սրա շուրջ չի ձևավորվում կառավարությունը, ունենաս 3, թե 13 պորտֆել, այդ իմաստով որևէ բան չի փոխվում, թե իրականում ինչպես են կյանքի կոչվում որոշումները. որոշումները կիսանախագահականի դեպքում բխում էր նախագահականից, իսկ պառլամենտականի դեպքում՝ ոչ»,-ասաց նա: «Պետք է հասկանալ, հայտարարություններից որոնք են իսկությանը համապատասխանում, որոնք` ոչ: Անկախ նրանից` անձն ում դուրն է գալիս, ում դուրը չի գալիս, նա ունի իր իրավունքները պաշտպանելու իրավունք: Հիմա մեկն էլ կարող է ասել, որ գնացել եմ և տեսել եմ, որ Վարդգես Գասպարին կտտանքների չի ենթարկվում: Պետք է լինեն փաստեր, և գործընթացը պետք է իրականա անկախ, անաչառ մարդկանց կողմից»,- ընդգծեց Ռուստամյանը և հավելեց, որ խցում ծեծի ենթարկվելը և հարցաքննության ժամանակ ծեծի ենթարկվելը խիստ տարբեր իրավիճակներ են. «Տեսեք` խցում ծեծի ենթարկվելն այլ բան է, բայց հարցաքննության ժամանակ ծեծի ենթարկվելը, որը տեղի է ունեցել իրենից ինֆորմացիա, ցուցմունքներ կորզելու նպատակով, այլ բան է, դրանք տարբեր բաներ են և տարբեր նշանակության էպիզոդներ: Շատ հավանական է, որ խցում վեճ է եղել: Ես մոտ երեք տարի խցոււմ եմ եղել, այնքան ծեծուջարդ է եղել, բայց ես չեմ ասում, որ դա եղել է անպայման կազմակերպված: Գողական աշխարհ է, հազար ու մի բան կարող է լինել»:

2016-02-26

 
ից մինչև
ԳԼԽԱՎՈՐ
ՀՀ ԱԺ ՀՅԴ խմբակցության ղեկավար Արմեն Ռուստամյանի ելույթը 2017թ....
ՀՀ Ազգային ժողովի ՀՅԴ խմբակցության պատգամավոր Աղվան Վարդանյանի...
Ավելի հավակնոտ, թիրախավորված ծրագիր է. Աղվան Վարդանյանը՝ կառավարության...
...
Այլ...