Արմեն Ռուստամյան. Դաշնակցության տեսակետները չեն փոխվել և չեն փոխվի (Դիտել տեսանյութը)

ԱԺ ՀՅԴ խմբակցության ղեկավար Արմեն Ռուստամյանն ԱԺ ճեպազրույցների ժամին տեսակետ հայտնեց, թե Ընտրական օրենսգրքում ծուղակներ չի տեսնում: Ըստ նրա՝ ԸՕ-ում կա առնվազն 4 կետ, որը երաշխավորում է, որ 2017 թ-ի խորհրդարանական ընտրությունները կլինեն աննախադեպ և նորություններով լի: «Առաջին՝գնացել ենք մեծամասնական ընտրության վերացմանը, այստեղից որևէ ծուղակ չկա, քանի որ տիպիկ համամասնական է լինելու: Տեղի չի ունենում ուղղակի անձի ընտրություն, այլ անձի ընտրությունը տեղի է ունենալու ածանցված կարգով, քանի որ առաջ է բերված կուսակցությունը: Սա բաց ցուցակ է լինելու, իսկ գործող համակարգով կիսափակ կամ կիսաբաց է»,-ասաց նա: Ըստ ՀՅԴ պատգամավորի՝ երկրորդ կետն այն է, որ կարողանալ ավելի ժողովրդավարական դարձնել կայուն մեծամասնությանը վերաբերող սկզբունքը: «Այժմյան տրվող սահմանումն ընդունելի է, քանի որ կոալիցիաների մեծաթիվ լինելը բերում է կայունության պահպանման»,-ասաց նա: Երրորդն, ըստ նրա, խորհրդարանում ապահոված է ընդդիմության տեղը, և անկախ ամեն ինչից նրանք ԱԺ-ում մեկ երրորդ ձայն պետք է ունենան: Իսկ չորրորդը, նրա խոսքով, ընտրակեղծիքների կանխարգելման հետ կապված բարեփոխումներ կան: «Հիմա աշխատում են հասկանալ, թե ինչպես կարող են շրջանցել ընտրության մասնակցած անձանց ցուցակների հրապարակման իրավական արգելքը»,- թվարկեց Ռուստամյանը: Արմեն Ռուստամյանը հակասություններ չի նկատում այն հարցում, ՀՀԿ-ի համար ընտրության մասնակցած անձանց ցուցակների հրապարակման թեման փակված է, իսկ ՀՅԴ-ն պնդում է, թե իրավական արգելքի շրջանցման ուղիներ են որոնում: «Ես ասում եմ, եթե չգտնվեն ուղիներ, այսինքն՝ դեռևս ուղի չի գտնվել և խնդիրը լուծված չէ, իրավական արգելք գոյություն ունի և դա փաստ է : Հիմա մենք շրջանցելու ձևեր ենք փնտրում, սակայն չի նշանակում , որ հակասություն կա, հակասություն չկա: Եթե չգտնենք, ապա կարծում եմ, որ նույն էլեկտրոնային համակարգով գրանցումը, հաջորդ օրը ցուցակների ծանոթանալն արդեն իսկ լուրջ կանխարգելիչ գործողություններ են ընտրակեղծարարությունների դեմ»,- ընդգծեց նա: ՀՅԴ-ական պատգամավորն, ի դեպ, ողջունում է, որ ԸՕ-ի հետ կապված հասարակական դժգոհություն կա և ավելացնում, թե քննարկումները պետք է կառուցողական լինեն: «Շատ լավ է, որ հասարակության մասնակցությունը, սակայն կարևոր է կառուցողական դաշտում գործելը: Ընդդիմությունը պետք է հասկան, որ ամեն ինչ կամ ոչինչ սկզբունքով շարժվելն արդյունք չի տալիս: Սահմանադրության էլ էին դեմ, սակայն հիմա ուզենք, թե չուզենք պետք է ապրենք այդ սահմանադրությամբ: Պետք է հասկանալ՝ ռեալ պոլիտիկ ասվածը որն է»,-ասաց նա: Դիտարկմանը, թե ընդդիմությունն, ասես, միասնական պլատֆորմ է տեսնում քաղաքացիական հասարակության հետ և հնարավոր է նաև փողոց դուրս գալու տարբերակ քննարկվի, ՀՅԴ-ականը պատասխանեց, որ որևէ խնդիր չի տեսնում, թող հասարակություն էլ մասնակցի, և քննարկումը տեղի ունենա կառուցողական դաշտում: «Կառուցողական դաշտում պետք է դա պարզապես լինի, ուլտիմատում դնելով չէ, կա'մ ամեն ինչ, կա'մ ոչինչ տարբերակով չէ: Ընդդիմությունը պետք է հասկանա, որ այս գործելաոճը արդյունք չի տալիս: Եթե, ասենք, նրանք տասը կարևոր հարց ունեն, և դրանցից ութը համաձայնեցվի, թող համարեն մեծ հաջողություն, ոչ թե մտածեն, որ տասից տասին էլ համաձայնություն չի տրվել, և դա վատ է»,- ասաց Ռուստամյանը և հավելեց, որ այդպիսի մոտեցման արդյունքում իշխանությունը կարող է ասել` եթե այդպես է` որևէ առաջարկ էլ չենք ընդունում: «Եթե քաղաքական համաձայնությամբ կարող ենք հասնել ավելի լավ արդյունքի, ուրեմն արժե անել, որովհետև մենք բոլորս էլ պետք է գնանք ընտրությունների: Եթե մի քանի մեխանիզմ էլ ավելացնենք, մենք բոլորս էլ օգտվելու ենք: Պետք է մարդիկ հասկանան, թե ռեալ պոլիտիկ ասածն ինչ է: Դրա հնարավորությունը կա, բոլորի տեսակետներն արտահայտվում են: Ես չեմ տեսնում, որ որևէ մեկը տեսակետ չարտահայտի»,- ընդգծեց նա: Ըստ Ռուստամյանի` թեև իրենք իշխանության հետ համագործակցում են, բայց ազատորեն արտահայտում են իրենց տեսակետը: «Բոլորը գիտեն, որ Դաշնակցությունն ունի հստակ դիրքորոշումներ` այս հարցերի հետ կապված, բայց մենք կարող ենք հարցեր քննարկել և գնալ կոմպրոմիսի»,- նշեց նա: Հարցին` եթե 2017 թվականի ընտրությունները կեղծվեն, հնարավո՞ ր է գրանցվի հերթական քաղաքական ապահարզանը, Ռուստամյանը պատասխանեց. «Ամեն ինչ էլ հնարավոր է: Խնդիրն այն չէ, թե տվյալ պահին ինչպիսին կլինի քաղաքական կոնյունկտուրան, կարևորն այն է, որ Դաշնակցության տեսակետները չեն փոխվել և չեն փոխվի: Մենք ամեն առիթ օգտագործում ենք, որ մեր գաղափարներն իրականություն դարձնենք: Դաշնակցությունն ամեն ինչ անելու է, որ, ունենալով լավ կառավարման համակարգ, լավ ընտրական համակարգ, էական թռիչքաձև զարգացման գնանք: Դրա համար Դաշնակցությունն ամեն քայլի գնալու է` չշեղվելով իր հիմնական սկզբունքներից: Մենք հենց կեղծիքների դեմ էլ պայքարում ենք»:

2016-03-18

 
ից մինչև
ԳԼԽԱՎՈՐ
Ընտանեկան բռնությունների կանխարգելման նախագծում շտկումների...
Դա մեծ հարված էր Հայաստանին, երկար ժամանակ պահանջվեց, որպեսզի...
Մենք ձեռք ենք բերում մի գործընկեր, եւ 2022 թ. ունենալու ենք լիովին...
Եթե դիմացինդ անբանակցելի է, դու չպետք է միջազգային հանրությանը...
Այլ...