Դաշնակցությունը կոչ է անում վերջ տալ «ռազբորկաներին» (Դիտել տեսանյութը)

Ազգային ժողովի Դաշնակցություն խմբակցության ղեկավար Արմեն Ռուստամյանը, անդրադառնալով Ղարաբաղի ներկա և նախկին պաշտպանության նախարարների միջև սկիզբ առած հեռակա բանավեճին, «Ազատության» հետ զրույցում ընդգծեց՝ դրանով պարզապես խարխլում են Ղարաբաղի պաշտպանության համակարգը: Վերջերս արտերկրից Հայաստան վերադարձած Սամվել Բաբայանը սուր քննադատության էր ենթարկել Ղարաբաղի ռազմական ղեկավարությանը, պնդելով, թե ապրիլյան քառօրյա ռազմական գործողությունների ընթացքում հայկական կողմը սխալներ է թույլ տվել, ինչի հետևանքով տարածքներ ենք կորցրել և զոհեր տվել: Ղարաբաղի պաշտպանության ներկայիս նախարար Լևոն Մնացականյանն էլ հակադարձել էր, թե 1994-ին Բաբայանը 21 կիլոմետր տարածք է հանձնել Ադրբեջանին: «Մենք դեմ ենք ընդհանրապես, մանավանդ այս օրերին, ինչ-որ ռազբորկաների, գզվռտոցների, նման երևույթների, մանավանդ, երբ տեսանք՝ դա նաև բռնություններով է ուղեկցվում: Սա լավ տեղ չի տանում, որովհետև ես վստահ եմ, որ այս ամենը արձագանք է ունենալու նաև Ադրբեջանում: Եվ սա պարարտ հող է ստեղծելու, որ ևս մեկ անգամ տպավորություն առաջանա, որ մենք մեր մեջ ինչ-որ պառակտման խնդիրներ ունենք: Հիմա ես կոչ կանեի, որ իսկապես հանդարտվեն, սթափ նայեն իրավիճակին, թույլ չտան, որ փոխադարձ այս մեղադրանքները օգտագործվեն թշնամու կողմից», - կարծիք հայտնեց Ռուստամյանը: Արմեն Ռուստամյանի կարծիքով, ճիշտ կլինի, որպեսզի «ցեխարձակումների փոխարեն» կողմերը ճանապարհներ գտնեն միասին քննարկելու առկա խնդիրները: Ընդ որում, այդ քննարկումները պետք է փակ լինեն, չի կարելի պաշտպանության հարցերը հրապարակավ քննարկել, դա լավ տեղ չի տանելու: Ստեփանակերտում Սամվել Բաբայանը հայտարարել էր, թե ստիպված է հասարակության հետ քննարկել այդ թեմաները, քանի որ ԼՂ ռազմական ղեկավարությունը իրեն չի ընդունել, որպեսզի քննարկեն այդ հարցերը: «Ազատության» հարցին՝ ինչո՞ւ չեն ընդունում Բաբայանին, Ռուստամյանը պատասխանեց․ - «Եթե սկսում ենք ինչ-որ մեղադրանքներով խոսել, բնական է՝ դժվար է լինում կոնտակտը: Դրա համար եմ ասում՝ պետք է զերծ մնան դրանից առաջին հերթին: Երկրորդը՝ իրենք հենց, բոլորը, պաշտպանության ղեկավարությունն են իրականացրել իրենց ժամանակներում և շատ լավ պետք է հասկանան, որ պաշտպանությունը խարխլող որևէ քայլ չի կարելի թույլ տալ, իսկ այն, ինչ կատարվում է, ըստ էության խարխլում է այդ պաշտպանությունը»: Դաշնակցություն խմբակցության ղեկավարը չի բացառում, որ այդ ներքին «ռազբորկաների» արդյունքում էր նաև ծեծի ենթարկվել Լեռնային Ղարաբաղի Ազգային ժողովի ընդդիմադիր պատգամավոր Հայկ Խանումյանը: Ուշագրավ է, որ իշխանության մաս կազմող Ռուստամյանը այս ծեծի ետևում հենց քաղաքական ենթատեքստ է տեսնում: «Քաղաքական ենթատեքստ տեսնում եմ այն պարզ պատճառով, որ առջևում ընտրություններ կան, և այդ ընտրությունների շեմին ես միշտ նման ակտիվություն նկատել եմ», - ասաց նա: Դաշնակցական պատգամավորը, սակայն, ընդգծում է՝ այն ուժերը, որոնք նախաձեռնել են այս ծեծը, մեծ վնաս են հասցրել Լեռնային Ղարաբաղի վարկին՝ այդ կերպ օգնելով ադրբեջանական քարոզչամեքենային: «Ով որ նախաձեռնել է այդ ծեծը, իսկապես երևի լավ չի հասկացել, որ առաջին հերթին մեծ հարված է հասցրել հենց Լեռնային Ղարաբաղի վարկին, որն ինձ համար ամենակարևորն է: Որևէ բան չարժեր, որ կարելի լիներ այդ քայլին գնալ և այդ գինը վճարել, և չպիտի թողնենք այն տպավորությունը, որ այնտեղ օրենքից դուրս, ինչ-որ անօրինական իրավիճակ է, չի ղեկավարվում, վերահսկողություն չկա», - ասաց Արմեն Ռուստամյանը, - «Որովհետև ամբողջ աշխարհով, գիտեք, որ նույն ադրբեջանցիները հիմնական թեզը որ տանում են, ասում են, որ դա սև գոտի է, որտեղ չեն գործում մարդու իրավունքները, հիմնարար ազատություններն ու իրավունքները: Չի կարելի այդպիսի քայլեր կատարել, հետո ասել, որ գիտեք՝ մենք իսկապես ջատագով ենք մեր երկրի կայացմանը: Մարդիկ պետք է հասկանան, որ դա մենակ խոսքեր չեն»:

2016-06-09

 
ից մինչև
ԳԼԽԱՎՈՐ
Շատերին պետք է, որ աղետալի լինի վիճակը երկրում. Արմեն Ռուստամյան
Քաղաքացին հաճախ պասիվ մասնակցություն ունի ՏԻՄ որոշումների կայացմանը....
Հայտնի է, թե ովքեր են խմբակցությունների ղեկավարները եւ քարտուղարները....
Մեզ ձեռնտու է մշտական հանձնաժողովների թիվը կրճատել, դարձնել...
Այլ...