Հանդիպել են Ֆրանսիայի եւ Հայաստանի խորհրդարանների բարեկամական խմբերի անդամները

ՀՀ ԱԺ Հայաստան-Ֆրանսիա բարեկամական խմբի անդամները հունիսի 19-ին հանդիպել են Ֆրանսիայի խորհրդարանի Ֆրանսիա-Հայաստան բարեկամական խմբի անդամների հետ։ Բարեկամական խմբի ղեկավար Արմեն Ռուստամյանը, ողջունելով ֆրանսիացի գործընկերներին խորհրդարանում, նշել է, որ հայ-ֆրանսիական հարաբերություններն առանձնահատուկ են. Ֆրանսիան Հայաստանի համար ամենահարազատ երկրներից մեկն է: Ըստ Արմեն Ռուստամյանի` բարեկամական խմբերը մեծ դերակատարություն ունեն հայ-ֆրանսիական դարերից եկող պատմական կապերն առավել զարգացնելու, դրանք կոնկրետ գործերով հարստացնելու գործում: Այս համատեքստում պատգամավորն արժեւորել է ֆրանսիական պատվիրակության այցը կառավարման խորհրդարանական համակարգի անցած եւ փոփոխությունների ուղին բռնած Հայաստան: Արմեն Ռուստամյանը կարեւորել է Ֆրանսիական պառլամենտարիզմի եւ ժողովրդավարության մեծ փորձի ուսումնասիրությունն ու ներդնումը մեր երկրում: «Հայ-ֆրանսիական բարեկամությունը գերակա արժեքներից է մեզ համար՝ անկախ կուսակցական պատկանելիությունից»,-ասել է բարեկամական խմբի ղեկավարը։ Նրա խոսքով` կա մեծ ներուժ ներդրումներ կատարելու եւ տնտեսական հարաբերություններն առավել զարգացնելու համար, ինչին պետք է նպաստեն նաեւ խորհրդարանական բարեկամական խմբերը: Ֆրանսիա-Հայաստան բարեկամական խմբի ղեկավար Ժակ Մարիլոսյանը, շնորհակալություն հայտնելով ջերմ ընդունելության համար, կարեւորել է տնտեսական փոխգործակցության խթանումը: Ըստ նրա` ֆրանսիական կողմը պատրաստ է աջակցելու հատկապես երիտասարդ ֆրանսիացի գործարարներին` ներդրումներ կատարել Հայաստանում: Ֆրանսիացի խորհրդարանականը պատրաստակամություն է հայտնել աջակցելու նաեւ Հայաստանում ժողովրդավարության հետագա ամրապնդմանը։ Ֆրանսիա-Հայաստան բարեկամական խմբի անդամ Դանիել Կազարյանը նշել է, որ Հայաստանում տեղի ունեցող փոփոխությունները դրական արձագանք են գտել միջազգային հանրության շրջանում: Նրա խոսքով` քաղաքական ու տնտեսական նոր իրավիճակը նոր ներդրումների հնարավորություն է բացում Հայաստանի համար։ «Ներկայում եւ ապագայում մենք կլինենք Հայաստանի աջակիցն այս հարցում»,-հավաստիացրել է ֆրանսիացի պատգամավորը: Հայաստան-Ֆրանսիա բարեկամական խմբի անդամներն իրենց խոսքում կարեւորել են երկկողմ խորհրդարանական փոխգործակցությունը: Ընդգծվել է հայ-ֆրանսիական կապերի հետագա խորացումը տարբեր ոլորտներում, հատկապես` տնտեսության բնագավառում:

2018-06-19

 
ից մինչև
ԳԼԽԱՎՈՐ
Իսկապե՞ս մտածում եք, որ Արցախի հարցի լուծումը կարելի է ստանալ...
Հայաստանը հզոր է Սփյուռքով, Սփյուռքը իմաստավորվում է Հայաստանով...
Կասկածանքը լավ վահան է, բայց վատ սուր (Տեսանյութ)
ՀՅԴ-ին ոչ ոք չի կարողացել փուռը տանի
Այլ...