ՀՅԴ-ն դեմ էր, բայց հանուն համախոհության ժամանակին կողմ արտահայտվեց ռեյտինգային համակարգին. Սպարտակ Սեյրանյան (Տեսանյութ)

«Առաջին լրատվական»-ի զրուցակիցն է ԱԺ ՀՅԴ խմբակցության պատգամավոր Սպարտակ Սեյրանյանը: -Այսօր տոն էր Ձեզ համար, տոնականության ի՞նչ տրամաչափ կարող եք նկարագրել: -Չէի ասի տոն այն իմաստով, ինչ իմաստով մեծ տոներն են լինում: Գուցե դեռ այն աստիճանի վրա չենք, որ հասարակությունը գիտակցի, թե Սահմանադրությունը իր կյանքի ու կենսագործունեության համար ինչ կարևոր նշանակություն ունի: Դեռևս ժամանակ է պետք, որպեսզի արմատավորվեն ավանդույթները, օրինակ, Անկախության հռչակագրի օրը, Անկախության օրը, Սահմանադրության օրը, որպես տոն հավուր պատշաճի ընկալելու համար: -Գուցե հասարակությունը հոգու խորքում մտածում է, որ ընտրությունների նման սահմանադրական հանրաքվեներն էլ են կեղծվել, և չարժի սրտին մոտ ընդունել այդպիսի մի փաստաթուղթ, որը կեղծիքով է ընտրվել: -Ընտրությունների վերաբերյալ հասարակության հոռետես տրամադրությունները հիմք ունեն: Բայց ես կարծում եմ, որ այդ կեղծումների շրջանն էլ երևի պետք է հասարակությունը հաղթահարեր, մինչև հասնի այլ գիտակցության մակարդակի. կաշառատվությունը միակողմանի ակցիա չէ, եթե չլինի կաշառք տվող, չի լինի նաև վերցնող: -Ի՞նչ տրամադրություններն են այն հանձնաժողովում, որտեղ Ընտրական օրենսգիրքն է քննարկվում. ի՞նչ վերաբերմունք ունեն միմյանց նկատմամբ քաղաքական ուժերը: -Աշխատանքային և շատ պատրաստակամ, բարյացակամ մթնոլորտ է. խմբակցությունները ներկայացնում են իրենց տեսակետից առանցքային խնդիրները: Մեր հանձնախումբը զբաղված է այդ առաջարկները մուտքագրելով: -Այսինքն՝ բոլո՞րն են ուզում փոխել Ընտրական օրենսգիրքը: -Այս օրենսգրքի փոփոխության անհրաժեշտությունն առաջացել էր դեռ այն պահից, երբ այն ընդունվեց համախոհության, կոնսենսուսի պայմաններում… Հնարավոր չէ իդեալական օրենսգիրք ստեղծել, որը տասնամյակներ փոփոխության կարիք չունենա: ՀՅԴ-ն դեմ էր, բայց հանուն համախոհության ժամանակին կողմ արտահայտվեց ռեյտինգային համակարգին: Բայց այդ համակարգը չաշխատեց: -Մտավախությունն այն է, որ նորից կուսակցություններին չհաջողվի փող ունեցողներին օգտագործել ընտրական ցիկլում: -ԸՕ փոփոխությունների թիվ մեկ նպատակը փող ունեցողների համար խոչընդոտներ սարքելը չէ: -Փող ունեցողներ ասելով՝ նկատի ունեմ քվեներ գնողներին: -Այո, ես էլ: Չփորձենք ենթադրել, թե կարելի է ստեղծել այնպիսի մեխանիզմ, որ նման երևույթների դեմը 100 տոկոսով փակելու է: -Լավ ընտրությունները լավ օրենսգրքով են պայմանավորված: -Ոչ, ընտրություններն ամբողջովին պայմանավորված չեն լավ օրենքից, բայց լավ օրենսգիրքը նվազագույն անհրաժեշտ պայմանն է: -Իսկ ո՞րն է ամենակարևոր պայմանը: -Ամենակարևոր պայմանը հասարակության մեջ քաղաքական գիտակցության բարձրացումն է, երբ որ հասարակությունը քաղաքական ուժին կամ մարդուն քվե տա՝ նրանից ոչ թե ընտրություններից առաջ ակնկալելով ինչ-որ բան, այլ ընտրություններից հետո: Մարդը պետք է հասկանա, որ ԱԺ ընտրությունների ժամանակ իր վաճառած, կամ ինչ-որ մեկի հորդորով, կամ ինչ-որ մեկի գեղեցիկ աչքերի սիրույն արած ընտրությունն անմիջականորեն անդրադառնում է իր, իր երեխաների ու թոռների ճակատագրի վրա: -ՀՅԴ-ի հասցեին հնչող քննադատությունները ինչքանո՞վ են օբյեկտիվ: -Ցանկացած քննադատություն ունի օբյեկտիվ, սուբյեկտիվ, առարկայական, չափազացված և ռեալ մոտեցումներ: Բայց միշտ չէ, որ քննադատություն է հնչում, այլ մեղադրանք՝ մտացածին երևույթների հիման վրա, դա բամբասանք է: -Երեկ նախկինների հետ էին, այսօր նորերի հետ են. սա՞ էլ է այդ համատեքստում: -Խնդիրն այն չէ, որ Դաշնակցությունը շատ էր ուզում նախորդ իշխանության հետ կոալիցիա կազմել, գնացել համոզում էր, նրանք էլ մի կերպ համոզվեցին, կամ մենք նոր իշխանությանը համոզել ենք, որ մեզ ընդունեք կոալիցիա: Կառավարության ձևավորումը որևէ քաղաքական ուժի հետ երկկողմանի պրոցես է, այսինքն՝ եթե դիմացինը չի ուզում, դու հո զոռով չես լինելու, կամ եթե դիմացինը շատ կանչում է և քո կարիքն ունի, դու հո չես մերժելու: –Երբեմն հանդիպում ենք ինքնախոստովանությունների ՀՅԴ-ի ներսից, երբ նրանք, հիմնականում նախկին դաշնակցականներն ասում են՝ մեզ մոտ ինքնամաքրման հրամայական է դրված: -Ինքնամաքրում բառը հասկանում եմ այն մարդկանց պարագայում, որոնք գտնում են, որ իրենք կեղտոտ են: Եթե խոսքը վերաբերում է ախալներն ու թերությունները վերացնելուն և նոր աշխատելաոճ որդեգրելուն, դա մի գործընթաց է, որը խրախուսվում է: Բայց նախկին դաշնակցականները, երբ խոսում են ինքնամաքրման մասին, մի քիչ թող մտածեն, թե ինչու են նախկին դաշնակցական, գուցե ինքնամաքրվելով շանս ունեն նորից դաշնակցական դառնալ: -Հաշվի առնելով Ձեր երկարամյա համագործակցությունը իշխանության թևերի կամ քաղաքական ուժերի հետ, ի՞նչ եք կարծում, ՀՀԿ-ում տեղյակ էին ոչ քաղաքական թևի խոհանոցից: -Չեմ կարծում, որ շատ ու շատ երևույթներ, որ տեղի են ունեցել, անպայմանորեն վերաբերում են ՀՀԿ-ին՝ որպես կուսակցություն: Որևէ կուսակցականի գործունեությունը տարածել ամբողջ կուսակցության վրա, կոռեկտ չէ: Կդժվարանամ ասել, թե ՀՀԿ-ում ով ինչ չափով և ինչից էր տեղեկացված: Իմ խորին համոզմամբ՝ հանցանք գործող մարդը չունի կուսակցական պատկանելություն, նա հանցագործ է: -Ինչպե՞ս է զգում ՀՅԴ-ն իրեն այս պայմաններում: -Աշխատանքային վիճակի մեջ, ԱԺ-ում հսկայական աշխատանքներ կան… Ցանկացած իշխանության և ցանկացած կառավարության կայացումը երաշխիք է, որ ժողովրդի կյանքն ավելի է լավանալու: Հարցազրույցն ամբողջությամբ՝ տեսանյութում:

2018-07-05

 
ից մինչև
ԳԼԽԱՎՈՐ
Պետք է ընդդիմություն ու իշխանություն լինել հօգուտ պետության
Արտաքին քաղաքականությունը շատ նուրբ արվեստ է, այդտեղ ամեն մի...
Եթե ՀԱՊԿ-ում խնդիրներ առաջանան, առաջին օգտվողը լինելու է Ադրբեջանը....
90-91 թվականներին շատ լավ ընտրություններ ենք ունեցել, բայց դրանից...
Այլ...